Must Read
Omo, Nigeria’s own billionaire and CEO of Dangote Refinery, Aliko Dangote, don double him money to $28 billion! And guess why? His long-awaited oil refinery don finally start work, and the money just dey rush in.
According to Bloomberg Billionaires Index, they don confirm on Thursday say as Dangote’s refinery begin operation, e boost the man’s wealth well well. E no be small thing o. This refinery wey dey for Lekki Free Trade Zone, Ibeju-Lekki, Lagos, na the biggest single-train refinery for the whole world, and e no just big, e dey advanced gan!
This refinery fit process different types of crude oil from anywhere for the world. Dem talk say the thing go change Nigeria economy for good, because e go make us no need to dey import fuel anyhow again. As Bloomberg put am, “E don double Dangote’s net worth to $28 billion.” Na so the man just dey smile go bank.
Expectations don high now o, as people dey talk say this refinery go scatter ground for Nigeria energy sector. We no go dey depend on foreign fuel again. Instead, we go dey produce our own petrol here for Naija. Who no like better thing?
Analysts don yarn say Dangote’s money fit even increase again as the refinery dey produce more fuel and add more refined products. Na Dangote go soon carry first for Naija fuel market. The man even get plans to sell some of the fuel to other African countries. Omo, the man no get rival.
At 67 years, Dangote still dey hustle like young boy. Most of his wealth come from Dangote Cement, where he hold 86% stake. That cement company alone na over $9 billion, and e get operations for ten African countries. As if that no do, Dangote Group still dey inside food production, fertilizers, and real estate business.
No be small thing o! This man no dey play at all. We sef dey look forward to see how him wealth go continue to grow as him dey dominate everywhere. Wahala for who no get refinery!
